Ek pushp

“Baba, ek pushp mandir ka la do.”

Ab bhi kaanon mein tatpar se,

goonj uthte hain shabd jab,

iss sansaar ke nishthur se,

neeyam kar dete hain stabdh tab.

Inn nayanon ki moorat wo,

uski bholi si soorat wo,

nanhe-nanhe haathon ki,

nanhi-nanhi ungliyaan,

haathon se mere lipti thhi,

jeevan aur mrityu ki akalpit paheliyaan,

hriday se kab mere nipti thh.

Kya kehta ab uss se main?

Saare akshar kho gaye,

maano saari bhaavnaon par,

nukili kayi bediyan aa jhapti thhi.

Socha, tod doon ye neeyam main,

kho baitha thha saiyyam main.

Uski har shwaas bandhi bandhi si aati thhi,

aasha se ot-prot nayanon ki dori,

mushe niraasha de jaati thhi

Kahan hai tera nyay prabhu?

Kyun tu neeyam todta hai?

Kyun chheenega munni meri?

Kyun mujhe akela chhodta hai?

Hey saadhuo! Kuch karo!

Jala do ye haath mere jo jalaayenge kal uski chita,

reh kar jeevit naam maatr, kal mar jayega ek pita.

Dobara likhi jaayegi geeta,

kal usmein judega naya adhyaay prabhu.

Kahan hai tera nyaay prabhu?

Main kitna asahay, kitna nirbal hoon,

bhale hi kitna main nischhal hoon.

Jinn nayanon se neer ponch,

unhein kiya thha ashru-rahit,

jin haathon se mitti ponch,

unhein kiya thha maail-rahit

girte sambhalte, haath pakad, ungli pakad, dheere-dheere chalte,

nanhe kadamon ko de jeevan,

de ek mitti ki gudiya, radd kiya thha uska roodan.

Nanha rangeen lehenga pehna,

baitha kar kandhon par apne,

ghanton baithe ghar ki parchhatti par.

Dekhe thhe shyamal kitne sapne,

jiski nidra ki laghu jhapki ke liye,

kiye thhe maine kitne jatan,

jiske pehli baar 'baba' kehne par

bhar aaye thhe mere nayan,

ek bebasi si hoti, jab wo tutlaati si poochti...

“Baba, hum mandir kab jaayenge?”

phir main tujhse prashn karoon,

“Kahan hai tera nyaay prabhu?”

tere iss sansaar mein manushya kyun neeyam banaate hain?

Koi bataye kis aadhaar par, hum achhoot kehlaate hai?

Kabhi kabhi to vishwaas nahi aata teri iss shakti par,

kahan hai tu jab padi bediyan, teri bhi iss bhakti par?

Unhein kisne adhikaar diya ke moorti par teri wo maala chadhayein?

Hamaare to wo paair kaat den,

jo humne maatr ore teri kadam badhaye.

Kya doon a tu hi bata, uss masoom ko achhoot ka paryaay prabhu?

Kahan hai tera nyaay prabhu?

Nahi hai samay itna,

har kshan mrityu prakaashit,

uski nishchhal nanhi aankhein,

khulti, band ho jaati phir,

band ho gaye hain ab to,

unse ashru bhi gir-gir.

Jaise antarmann mein kehti,

aaj asambhav ko sambhav bana do,

phir rookhe adharon se kehti,

“Baba, ek pushp mandir ka la do”

daudta, adheer kadamon se main,

ho gaya ojhal nayanon se uske,

kuch hi kshanon mein laut,

pushp mandir ka la rakha haathon mein uske.

Antim ichha jyon poorn hui to,

nayan tyon muskura uthe,

laga jaise har ichha sampoorn hui ho.

Teri kriti ka matlab mujhko,

samjha gaya dhuan jalti chita ka,

kyun mujhe diya sainyyam itna,

kyun bada banaya hriday pita ka.

Sama gayi usmein saari peeda,

nayanon mein roodan na raha.

Ek baat par ab bhi mujhe,

poorntah sataati hai kahin,

poorn to ki antim ichha uski,

par wo satya to thha nahi.

Ho sake to kar dena kshama putri,

wo pushp mandir ka to thha nahi.

Ye na tu kehna mujh mein,

neeyam todne ka nischay nahi thha,

peedhiyon ki bedi todta par,

itna mere paas samay nahi thha.

Anyaay koi baar-baar ho sakta hai,

par nyaay jhukta nirantar nahi,

saare pushp hain ishwar ke,

doli par ho, shaiyya par ya ho mandir mein,

unmein kahin koi antar nahi.

Mandir ka pushp kuch asabhy logon ke kaaran,

mujhe aaj labhy nahi,

tujhe diya pushp eeshwar ka,

to tu hi bata kya ye satya nahi?

Kuchh aisa kar ke sansaar mein,

koi anyaay n rahe,

iss mein chhoot-achhoot ka,

koi adhyaay na rahe.

Phir na kisi marti putri ke liye,

koi asahay pita bahaana banaaye prabhu,

phir na wo tujhse pooche,

“Kahan hai tera nyaay prabhu?”